حكايات إسلام صالحين

اتكلم عن التهجير؟؟ طب ما الكل هيتكلم عن التهجير !!
اتكلم عن احلام واماني النوبيين وحلم العوده وعودة الحلم ؟؟.....ما طبيعي ان الكل هيتكلم عن نفس الهري ده

اتكلم عن عنصرية وطن ضد ابناؤه ؟؟؟ ريقي نشف وماحدش مقتنع

طب لما أجي ادون عن النوبة اكتب ايه ؟؟؟ اقول ايه ؟؟

بصوا الصراحة والصراحة راحة ...جيلنا كله النوبة بالنسباله حكايات ...احنا الجيل الثالث المولود بعد التهجير يعني بعض اباؤنا انفسهم لم يعاصروا التهجير ولكن ده ماينطبقش عليا لان المرحوم ابويا عاش تهجيرين مش تهجير واحد لانه كان كبير في السن

لكن هرجع واقول ان النوبة بالنسبالنا هي حكايات عشنها وسمعناها وهموم تزخم بيها الحكايات دي بعد ما تتحكيلك تشارك اللي حكاها في حمل هذا الهم الى ان يموت الراوي فتصبح حاملا وحدك همومه وهمومك بل وهموم قوم ولغة وحدوتة كبيرة اوي سعادتك

طب ما اقولكم حكايات او خليني اجيبلكم مقاطع من حكايات بتحمل حزن وقهر فرح وسعادة ....ايام اتعاشت وايام اتنست ولغة لم يبقى منها الكثير

اسمعوا يمكن تعوا

من حكاية (جنيهة فاطوم)

لا مش مبسوطين ...مين مبسوط في جهنم الحمرا دي ؟؟ البيوت كانت طوب واسمنت وخرسانة !!! نعيش ليه في بيوت خرسانة .. عيال عبدالله ومراته حسنة راحوا لقيوا البيت مرسوم بالجير عالارض !! حتى البيت مافيش ضحكوا علينا ابويا جاب معاه فسايل نخل وهو جاي من البلد كان لاففهم في حصير علشان الحكومة ماتعرفش مكانوش حتى عاوزينا نجيب فسايل نزرعها في الارض الجديدة ....مالقيناش مية في الارض مالقيناش ارض اصلا !!! لا بيت ولا مية ولا ارض بس عيشنا ابويا حفر للفسيلة على باب البيت ... الارض ولعة نار ..الفسيلة ماتت في اسبوع واحد بقت حطب ...والناس عاشوا !!!

من حكاية (سيد عواض)

راحوا قالوا لبتوع دابود (احدى قرى الكنوز) لازم تمشوا مافيش ارض عندكم والجبال محاوطاكم وخلاص الفاجيكة هيرحلوا وانتوا اول ناس هتغرقوا يلا هنجيبلكم المركب ولملموا العنجريب (السرير النوبي) ويلا هتروحوا بلد تاني فيه ارض ومية وزرع وبيت اكبر من بيتكم

بعدين راحوا للفادكات قالولهم خلاص الكنوز اخدوا الفلوس و رحلوا ومافيش نوبة تاني يلا ارحلوا انتوا كمان ....كانوا بيوقعوا بينا وبين بعض وكرهوا الناس في الناس وكانوا قاصدين علشان محدش يقول لا هنفضل مش راحلين بس الكل صدق وزعلوا من بعض وفي الاخر الكل خسر والكل رحل

من حكاية (معروفية)

قالوا الكنوز رحلوا في مراكب كبيرة ونضيفة بس ماحصلش فلايك وصنادل وكله سوا الحصير و المواعين والعنجريب والهدوم والناس كله كله على بعضه لا اللي في الاول سافر مرتاح ولا اللي اتأخر هاجر مرتاح بس اللي سافروا بدري اتصدموا بدري وشافوا الوجع بدري ..... حكمت (تقصد الوزيرة حكمت ابو زيد ) قالتلنا انتوا المهاجرين و الانصار بانتظاركم في كوم امبو !!! والله قالت كده كمان عبد الناصر جابوه ووقفوه قصاد تمثال رمسيس كان حاجة تخوف والله راحوا لا لقيوا انصار ولا لقيوا ناس ....صحرا صحرا ورملة صفرا ولا في مية ولا ترعة حتى ولا في ارض اول ارض خدها الناس كانت بعد 8 شهور ... الكل هج يابني محدش اتحمل

من حكاية (نصرة حامد عطالله)

كنت عيلة صغيرة وقت التهجير وبلعب عالمركب انا والعيال ورسمنا سيجا بنات ودورنا على قشاط مالقناش حاجة تنفع ملقناش غير روث جاف من الحيوانات اللي كانوا بينقلوها على المراكب اللي نقلينا فيها ....لعبنا بيها

من حكاية (آمنة سر الختم)

انا كنت مع زينب جونيه اللي حكيوا عنها في رواية جبال الكحل ماكنش اسمها زينب بس نقول انها زينب او يمكن زينب حكايتها نفس حكاية الشابة اللي ولدت عالمركب وجالها حمى النفاس ومالحقنهاش .... البهايم اللي كانوا بينقلوها مطرحنا كانوا يشرطوا على التاجر انها تسافر مع بيطار والبني ادمين ماخلوش معاهم حلاق صحة حتى في الرحلة الطويلة دي !! الشابة ماتحملتش ياولداه فرفرت بين ايدينا وكانت بتنده على جوزها وضناها ... ولا واحدة من اللي كانوا عالمركب كانت بترضع .... ضنى الشابة مات من الجوع ولا رضيش يشرب كراوية ولا أيسون ....و ابوه مات وهو عايش حسبنا الله ونعم الوكيل

من حكاية عم سعد

12 راجل طويل عريض ملمومين علشان يتعاطوا !!! لا مخك مايروحش بعيد كانوا بيتعاطوا شاي بلبن .... اه يابني والله ماكانش في مية ولا تموين ولا فلوس كله دامو (مافيش بالنوبية) والناس ماتستغناش عن الشاي النوبي باللبن يختاروا بيت كل يوم يعمل براد شاي و يتلم الرجالة حلقات بره البيت يغنوا وبعدين يقتسموا الكام كوباية كل 12 في كوباية .. يشربوا و يروحوا وأدي التهجير واللي عشناه في التهجير

من حكاية ( الجارية حسين )

ماعرفش انا عايشة لحد دلوقتي ازاي !! امي دفنت 4 عيال (اخواتي) بعد التهجير نور الدين ومحمد وحسن وعبد الله .... نور ومحمد كانوا توائم وعمرهم كان 3 سنين وعبد الله كان الكبير 6 سنين و حسن كان 4 شهور كلهم ماتوا في اول سنة من التهجير التوأم ماتوا سوا في اسبوع واحد من ضربة شمس

وحسن جاله جفاف شديد وملحقهوش و عبد الله جاتله حمرة ومات في اسبوعين وكله من جو كوم امبو المقابر من كتر ما كانت مابيدخلهاش الا الاطفال الصغار سموا الترب الحضانة انا اتولدت في ثالث سنة من التهجير سموني الجارية لانهم كانوا خايفين عليا من خطافة العيال اللي الصعيد باعتها تخطف عيال النوبيين وتخنقهم !!

من حكاية الحاجة (عطية )

تلتقط الحديث من الجارية ...المدرسة الابتدائي ماكنش فيها فصول اولى وتانية ابتدائي !! ماكنش في عيال اصلا كله في الحضانة كله ماستحملش كله هاجر وخاف على عياله

ده النذر اليسير من الحكايات اللي بتتحكي في بيتنا وبيوت اهالينا من اللي عاشوا وعاصروا واتسحلوا في التهجير وبالتهجير

طيب امال جيلنا احنا اللي ما عاصرش التهجير بيحكي عن ايه ؟؟

من حكاية (سالي نوار)..استاذة جامعية

كل اللي بيحصل في النوبة وللنوبيين مؤلم ...لما اكون استاذة جامعية وكل ما افتح مسلسل ولا مسرحية ولا فيلم الاقي النوبي مالوش دور غير انه يكون مسخة وتقليعة واراجوز القعدة يبقى انطباعي ايه ؟؟؟ اقول لصحابي والناس الغريبة ايه عن النوبة وهم كل معلوماتهم هي عثمان عبد الباسط وادندان اللي مابيقومش بدور الا دور البواب !!

لما الاقي تترات فيلم (صعيدي في الجامعة الامريكية ) مكتوب مع نجمة النوبة :مستورة .....وتطلع الليدي مستورة قايمة بدور غانية وراقصة تأكل بثديها ولا دور لها الا مطاردة البطل للنوم معه بل وتتمادى في البغي و تضيفه في بيتها لا لشيء الا للاستمتاع به !!! بينما البطل نفسه لا يتورع عن اهانتها طول الفيلم ومعايرتها بلونها ...ده اساميه ايه ؟؟ مناقشة قضايا المجتمع ولا عنصرية فجة وقذرة ؟؟

من حكاية (احمد خالد) مهندس استشاري

 يلتقط الحديث من سالي ولا سليمان عيد في فيلم عيال حبيبة والاهانة المتناهية لاصحاب البشرة لسمراء ولا مسرحية حكيم عيون وفصل كامل من التأليس وممارسة العنصرية على البنت السمراء في المسرحية !! ابني اول ما اتعلم يمسك الجرنال ويقرى مقتطفات قالي بابي هو مش انت قلتلي ان احنا نوبيين قلتله :اه يا حبيبي ...رد وقالي طب ليه انت مش بتشتغل سواق ؟؟ قلتله ليه بتقول كده قالي اصلي قريت 3 مرات في الجرنال النهارده في الصفحة دي (اعلانات وظايف ) مطلوب سائق نوبي ....هو كل النوبيين لازم يشتغلوا سواقين .؟؟

 المفروض ارد على ابني اقوله ايه ؟؟

من حكاية (نجوى عصام ) مدرسة

انا مش نوبية بس كان عندي تلميذ شعلة في الذكاء ولما طلبنا في حصة معينة كل واحد يطلع يتكلم لمدة 5 دقايق عن شيء بيحبه ويعتز بيه .. طلع اتكلم عن انه نوبي ومن عائلة نوبية وان النوبة جزء عزيز من مصر وحكى عن تاريخها واصالتها وكل الفصل كان سعيد جدا باللي قاله وبعد كام يوم لاقيت حالة الولد سيئة جد وبيعيط طول اليوم والولاد مش مبطلين سخرية منه لانهم سمعوا اغنيه هيفا وهبي اللي الطفل بيقول فيها عاوز (القرد النوبي) ومن وقتها الولاد بيعايروا زميلهم بالكلمة دي لدرجة انه قالهم انا مش نوبي مالكمش دعوة بيا

من حكاية (علي حازم ) حاصل على ماجستير العلوم الزراعية من هولندا

انا درست في هولندا النباتات الطبية والعطرية و من درستي اقدر اقول ان افضل الاراضي واجودها لزراعة النوع الغالي جدا ده من النباتات هي منطقة ما خلف السد العالي وشوفت انها فرصة عمري اعمل مشروع لتنمية المجتمع النوبي بما اني نوبي واقدر افيد واستفيد مع اقتراب عودة النوبيين لاراضي ما خلف السد وعملت دراسة جدوى لمشروع ضخم وقدرت اجيب ناس تمول الفكرة كلهم من النوبيين المقيمين في الخليج بس طبعا واضح ان احفادي لو ليهم عمر يمكن ينفذوا المشروع لو رجعوا لاراضي ما خلف السد (في المشمش)

قائمة الحكايات ما بتنتهيش تقريبا وكل ما تحبوا تسمعوا حكايات هتلاقوا حكاوي بالهبل .......في ظروفنا دي نحن لا نملك الا الحكايات وكل حكاية يتجدد معاها وجع جديد وألم اعمق و عذاب يبقى للابناء والاحفاد ان يرثوه كما ورثناه من من سبقونا

بقلم / إسلام صالحين